Migrarien nazioarteko egunean, Abenduaren 18an aurkeztu zen Bilboko Euskal Museoan Ondare Bizia Euskal erbestearen, emigrazioaren eta behin betiko Euskadirako itzuleraren historia eta gizarte arloko zabalkunderako eta hausnarketarako plataforma eta aren karira Alberto Catenaccik ondu duen Ahaztutako Garaiak / Tiempos Olvidados dokumentala.
Aurkezpenean Sorkunde Aiarza Euskal Museoko Zuzendariak, Nerea Mujika Deustuko Unibertsitateko Euskal Gaien Institutuko Zuzendariak, Pedro Oiarzabal Ikerketa Proiektuko Koordinatzaile eta Ikerlari Nagusiak, Mauri Vicente Linked Knowledge enpresako ingeniariak eta Sonia Bonifacio Euskal Gaien Institutuko ikerlariek parte hartu zuten.
Pozgarria izan zen dokumentalaren eta webgunearen protagonista asko eta asko haien senitartekoekin bertaratu zirela ikustea eta proiektuaren aurkezpena zuzenean haiekin bizi ahal izatea. Elkarrizketatzaile (Ainara Puerta eta Ainara Arozena kasu), ikerlari eta elkarrizketatuek, hartara, lekukotzak jasotzeko lan honen inguruan iritziak trukatzeko aukera izan zuten.
Eskerrik asko hurbildu zineten guztioi. Eta bertaratzerik izan ez bazenuten, hemen dituzue plataforma eta “Ahaztutako Garaiak / Tiempos Olvidados” dokumentala:
https://www.youtube.com/watch?v=3A-SpjiEmD4&feature=youtu.be
