Deskribapena

2017ko martxoaren 29an ekin zien Britainiar gobernuak Europar Batasunetik irteteko baldintzak eta Batasunarekin aurrerantzean izango duen harreman statusa zehazteko negoziazioei. Bederatzi hilabete lehenago, Erresuma Batuko hautesleek Europar Batasunetik irtetearen aldeko botoa emana zuten.

Erresuma Batua ez zen Europar Batasuna sortu zuten estatuetako bat izan. Baina 1973an sartu zenetik, eraginik handieneko kideetariko bat izan da. Britainia Handiak Europar Batasunetik irteteko erabakiak, Europako gainerako estatuekiko harremanetan aldaketa dakar, jakina; baina, Theresa May lehen ministroak dioen bezala, Erresuma Batuak harreman estua izan nahi du EBrekin, bai ekonomian eta merkataritzan, bai defentsan eta segurtasunean. Batzuen eta besteen interesak egokitzea eta Brexitaren eragina ahalik eta txikiena izatea denen erronka da, baina ez zailtasunik gabeko erronka.